Annual Report 2025 IRISH - Flipbook - Page 49
Sprioc 1 - Ag Dul Chun Cinn
Leanfaidh TIBÉ ag díriú ar acmhainn uilechórais d'oideachas teanga ardchaighdeáin a neartú trí
fhoghlaim ghairmiúil spriocdhírithe, comhpháirtíochtaí straitéiseacha agus bealaí inbhuanaithe
d'fhorbairt múinteoirí.
Leanfaidh TIBÉ ag obair le hambasáidí agus le comhpháirtithe idirnáisiúnta chun deiseanna uasoiliúna
teanga agus deiseanna forbartha gairmiúla leanúnaí do mhúinteoirí a leathnú. Ag an am céanna, beidh
tacaíocht fós ar fáil do mhúinteoirí atá cáilithe i dteanga ach nach bhfuil á múineadh faoi láthair, mar
aon le tacaíocht dóibh siúd a chomhlánaíonn na riachtanais deiridh maidir le clárú leis an gComhairle
Mhúinteoireachta. Ag breathnú chun cinn, beidh gá le hiniúchadh leanúnach a dhéanamh ar chonairí
d'Oiliúint Tosaigh Múinteoirí agus le nasc-chúrsaí—go háirithe do theangacha curaclaim nua agus do
theangacha curaclaim tearctheagasctha—i gcomhar le comhpháirtithe ardoideachais agus beartais.
De réir mar a leanann an Roinn Oideachais agus Óige ag cur le rannpháirtíocht sa scéim Cúntóirí Teanga
Iasachta (CTI), leanfaidh TIBÉ de bheith ag díriú ar cháilíocht, comhsheasmhacht agus tionchar a chinntiú
trí na hacmhainní agus tacaíochtaí gairmiúla a chuireann sé ar fáil. Oibreoidh TIBÉ leis an Roinn freisin
chun cuir chuige nuálacha a iniúchadh chun tacú le scoileanna i gceantair iargúlta nó thuaithe rochtain
a fháil ar sholáthar CTI.
Ina theannta sin, scrúdófar deiseanna chun leas níos mó a bhaint as scéim chomhlántach na gCúntóirí
Béarla mar mheicníocht chun cumas teagaisc teanga a fhorbairt sa todhchaí, bunaithe ar fhianaise atá
ag teacht chun cinn ar an ról atá aici maidir le tacú le hinniúlacht teanga, inniúlacht idirchultúrtha agus
iontráil i ngairm na múinteoireachta.
Beidh soghluaisteacht na mac léinn agus na múinteoirí mar phríomhthosaíocht i gcónaí. Soláthraíonn
maoiniú Erasmus+ creat inbhuanaithe chun malartú agus soghluaisteacht idirnáisiúnta a leabú laistigh
de phleanáil scoile, ag tabhairt beocht do theangacha trí úsáid bharántúil agus tumoideachas cultúrtha.
Leanfaidh TIBÉ lena aistriú straitéiseach ó sholáthar díreach deontais i dtreo tacú le scoileanna agus
múinteoirí dul i ngleic go muiníneach le deiseanna Erasmus+, ag cinntiú inmharthanacht fhadtéarmach
agus ailíniú le dea-chleachtas na hEorpa.
Léiríonn rannpháirtíocht láidir i bPobail Chleachtais an luach a chuireann múinteoirí ar líonraí gairmiúla.
Leanfaidh TIBÉ de bheith ag freagairt d'aiseolas múinteoirí ach pobail theanga-sonrach agus pobail
théamacha a éascú, agus ag an am céanna oibreoidh TIBÉ le páirtithe leasmhara chun ról na líonraí san
fhoghlaim ghairmiúil a threisiú. Beidh fócas i gcónaí ar iniúchadh a dhéanamh ar mheicníochtaí a
thacaíonn leis na pobail seo a bheith ag éirí níos féinchothabhálaí.
Leanfaidh TIBÉ ar aghaidh ag taispeáint eiseamláirí de dhea-chleachtas i ngach teanga agus ag forbairt
agus ag scaipeadh acmhainní agus ranganna teagaisc ar ardchaighdeán, go háirithe i réimse na
dteicneolaíochtaí digiteacha. De réir mar a éiríonn intleacht shaorga ina gné níos suntasaí den tírdhreach
teagaisc agus foghlama, tá TIBÉ tiomanta do thacú le múinteoirí IS a úsáid ar bhealaí eiticiúla, fóinteacha
a fheabhsaíonn foghlaim teanga, bealaí atá slán ó thaobh na hoideolaíochta de.
Deis shuntasach don chóras is ea leathnú na Foghlama Comhtháite Ábhair agus Teanga (FCÁT). Má
leathnaítear FCÁT isteach sna blianta tosaigh den iar-bhunoideachas, agus i gcomhthéacs an tsoláthair
teanga bunscoile, tá sé de chumas aige dlús a chur le foghlaim teangacha trí rannpháirtíocht fhóinteach
atá saibhir ó thaobh ábhair de. Tacaíonn FCÁT freisin le cothromas agus cuimsiú ach foghlaimeoirí Béarla
mar Theanga Bhreise (EAL) a chumasú chun rochtain níos éifeachtaí a fháil ar an gcuraclam, rud a
chuireann le torthaí feabhsaithe agus le neamhionannais oideachais laghdaithe.
Mar fhocal scoir, leanfaidh an cultúr láidir comhoibrithe, a bhí ina shainghné ag obair 2025, de bheith
mar bhonn faoi obair TIBÉ. Beidh rannpháirtíocht leanúnach agus níos doimhne le páirtithe leasmhara
ar fud beartais, curaclaim, foghlama gairmiúla agus líonraí idirnáisiúnta ríthábhachtach i gcónaí chun
dea-chleachtas a roinnt, comhleanúnachas a chinntiú agus tosaíochtaí atá ag teacht chun cinn a aithint
d'fhorbairt leanúnach an oideachais teanga in Éirinn.
49
